WAZUNGU WACHACHAMAA ISHU YA RADA!

Waandamaji Majuu wakipinga uhuni waliofanyiwa Watanzania kutoka kwa BAE

Desemba mwaka jana SFO (Serious Fraud Office) Uingereza iliiamuru  kampuni ya BAE Systems inayouza vifaa vya ulinzi ulimwenguni kulipa faini kama adhabu ya shughuli zake mbovu za kibiashara na serikali za Saudi Arabia na Tanzania. Mwezi Februari 2011 BAE ilikubali sharti ambalo ni kuilipa SFO paundi milioni 285 na serikali ya Tanzania paundi 29.5 milioni (shilingi 75.3 bilioni), kama pesa za kujisafisha uso; ikiwa ni kuueleza ulimwengu mzima kuwa kampuni hiyo tajiri yenye wafanyakazi laki moja duniani, ina maadili mema.
Toka tamko litokee imezuka migogoro kadhaa.
Bonde moja wamesimama wananchi Bongo wasioamini viongozi  kwamba wana malengo ya kutetea maslahi yao. Hapo hapo, BAE Systems imetoa kauli kwamba pesa  ziende kwenye mashirika ya fadhila( na NGO) Tanzania ambayo kawaida ni ya kigeni. Imedaiwa barua zimeandikwa na wananchi kuiomba BAE isiipe serikali pesa hizo.
Kilima kingine wamekaa wabunge na viongozi wa serikali wanaoamini huu ni ukoloni mambo leo. Kwamba nchi tajiri kuiamuru nchi changa namna ya kufanya mambo yake ni utumiaji mabavu kiuchumi.
Kihistoria baada ya Waafrika kutawaliwa miaka zaidi ya 60 tuliachwa maskini na wale waliojali maslahi ya raia waliondolewa na Wazungu, mathalan Patrice Lumumba wa Kongo alieuawa 1961 na nafasi yake kuchukuliwa na Joseph Mobutu. Toka Jenerali Mobutu alipochukua madaraka mwaka 1965  hadi leo Kongo-Zaire imeharibiwa kabisa.
Wapo waliomudu kama Mwalimu Nyerere aliyetetea Uafrika na kujenga amani Tanzania ambayo tunayo hadi leo.
Toka habari kuhusu Wabunge wanne kuja Uingereza kuzungumzia mtafaruku huu  chuki na hasira iliyoenea kutokana na ufisadi ni kama imewashwa; kidonda kimetoneshwa. Mhusika mmojawapo wa tukio la 1999,  Shailesh Vithlani ambaye inadaiwa alipewa hongo kutimiza dili, hajulikani aliko. Hata baada ya mahakama ya Uingereza chini ya Justice Bean kuamuru ashtakiwe bado bwana Vithlani yadaiwa anajificha Uswisi.
Je, tutajuaje kwamba Wabunge wetu wanalo zuri moyoni, wanauliza wasomaji wengi mitandaoni? Je wahusika wengine katika dili hilo ambao bado wako serikalini wamefikia wapi? Je, tutaamini vipi kwamba mabilioni haya ya Waingereza yatatumiwa kusaidia elimu ya watoto wetu nchini, kama wanavyoahidi?
Hatuwezi kujua.
Tunaloweza kulifanya ni kuamini.
Kwa vipi?
Wakiongea katika Ubalozi wetu Uingereza mjini London, juma lililopita viongozi hao chini ya Naibu Spika wa Bunge Job Ndugai walihimiza  kuwa wanafuatilia matokeo ya mahakama ya sheria Uingereza inayochunguza rushwa (SFO) maana kadri muda unavyokwenda ndivyo riba inaongezeka.
Kampuni ya BAE systems huuzia ulimwengu mzima silaha mbalimbali za ulinzi wa majini, ardhini na anga, pia vifaa vya kisasa  vya mawasiliano ya habari, umeme, usalama na teknolojia. Mwaka jana BAE systems ilipata faida ya paundi bilioni 22.4 (takribani shilingi trilioni 60).
Wabunge walikutana na “House of Lords” ambacho ni kitengo cha juu Bunge la Uingereza chenye usemi mzito nchi hii ya Malkia. Walikutana pia na Wabunge wenzao akiwemo Naibu Spika wa Bunge Lindsay Hoyle. Walitegemewa pia kukutana na maofisa wa kampuni ya BAE Systems Philip Bramwell na Lesley Collen.
Mbunge, John Momose Cheyo ambaye ni mwenyekiti wa kamati ya Bunge inayohusika na Hesabu za Umma,  aliwahakikishia wanahabari kwamba katika miaka kumi toka tukio hilo la 1999 vyombo vya serikali dhidi ya rushwa vimebadilika na kuimarika. “Matumizi halali ya fedha yatakahakikisha pesa zitatumika kujenga elimu,” alisema mwakilishi huyu wa Bariadi Mashariki.
Wabunge walionyesha nia ya kutaka kusafisha jina la Tanzania, kurekebisha jina la viongozi wetu na kuleta sura mpya ya mambo yanayoiharibu Afrika.
Walisisitiza na kuahidi kinaga ubaga kwamba pesa zitaendeleza elimu.
Kauli yao ina maana macho yote yanawatazama na kuwategemea kama mashujaa wapya. Tusiwahukumu kabla hata ya kuanza.
Itakuwa vyema tukiikubali kauli yao kuwa wanadhamiria kutumia nafasi yao walioipatia kupitia kura za kidemokrasia kutenda la maana. Hakuna haja ya kumzomea mtu anayejaribu uzuri. Mwache kwanza amalize anachokidhamiria kabla ya kupiga kelele. La maana kwa sasa ni kuwatakia kheri maana kuna mawili. Nchi yetu kudharauliwa na wageni na  huduma mojawapo muhimu nchini, yaani elimu, kukidhiwa.
 
 Sasa hivi kweli tukibadilishana meza, tuseme Tanzania ndio tuwe na uwezo wa kufanya utapeli kwa kuwauzia rada Waingereza? Kisha  baadaye watushtukie kuwa tulifanya rafu?  Halafu sisi tuwaambie kuwa tutawalipa baadhi ya fedha kutumia NGOs zetu?  Je, tutakuwa salama? Je mnadhani Waingereza wataukubali usanii huo?
MGOGORO WA RADA ZA NDEGE BAINA SERIKALI NA BAE SYSTEM UNAWEZA KUWA CHANZO CHA UONGOZI BORA TANZANIA
Tafakari.
Asanteni,
*Imeandikwa na Freddy Macha pamoja na URBAN PULSE wakishirikiana na Jestina George

INAPENDEZA.

 Mke wa rais Obama, Michelle na watoto wake Sasha na Malia wamemtembelea mzee Mandela nyumbani kwake. SA

JALI AFYA YAKO.

Katika kuhakikisha elimu ya Afya inamfikia mlengwa kiurahisi zaidi,timu nzima ya TanzMED,imefanya mabadiriko makubwa katika tovuti yake ya tanzmed.com, Hii ni hatua muhimu ambayo itamuwezesha mwanajamii wa Kitanzania;

 -Kuuliza maswali ya afya moja kwa moja kwa kutumia TanzMED Forums
-Kuwasiliana na kufuatilia muendeleo(feedback) wa tatizo lako kwa kutumia mtinfo wa tiketi,Tuma tiketi
-Kujumuika,kubadilishana mawazo,matukio,picha nk na wanajamii wa TanzMED
-Tuma,tafuta au toa ushauri juu ya huduma mbalimbali za afya kwa kutumia Kitabu cha njano
-Pata taarifa(Zenye uhusiano na afya) juu ya skolashipu,kazi,mishusho,blogs nk
-Mafundisho ya mapishi,sayansi ya chakula,urembo na ushauri nasaha
-Tuma maoni moja kwa moja juu ya masuala ya afya yanayokutatiza

      Cheki nao: tanzmed.com

UHABA WA MADAWATI NCHINI NA UBUNIFU WA MADAWATI YA SARUJI.

HIVI karibuni asasi ya kiraia ya Twaweza kupitia programu yake ya Uwazi,ilifanya utafiti katika jiji la Dar es Salaam na kubaini upungufu mkubwa wa madawati katika shule za serikali.

Kwa mujibu wa matokeo ya utafiti huo uliohusisha sampuli ya shule za msingi 40 katika manispaa za Temeke, Ilala na Kinondoni, karibu nusu ya shule hizo hazina madawati ya kutosha, hali inayowalazimu wanafunzi kukaa sakafuni.

Na hata katika shule zilizo na madawati, wanafunzi wanalazimika kukaa watano katika dawati moja ambalo kimsingi linapaswa kukaliwa na wanafunzi wasiozidi watatu.

“Katika takribani nusu ya shule(18 kati ya 40), hapakuwa na madawati ya kutosha kwa wanafunzi wote, wengi wanalazimika kukaa chini…..,” inasema sehemu ya ripoti ya utafiti.

Kwa mujibu wa ripoti hiyo, ukosefu wa madawati ni tatizo kubwa katika Shule ya Msingi Kunduchi ambapo, robo tatu ya wanafunzi 1,931 katika shule hiyo hawana madawati. Pichani unaweza kuona ubunifu wa aina yake wa madawati ya saruji yaliyojengewa ndani ya darasa kama suluhisho la tatizo hilo.

Picha na story amenitumia Mdau Haki Ngowi kwenye Email yangu.

WANAWAKE TEGEMEZI HATARINI ZAIDI KUAMBUKIZWA UKIMWI.

Imeelezwa kuwa wanawake wanaopigwa au kutawaliwa kwa nguvu na waume zao wako hatarini zaidi kwa asilimia 48 kuambukizwa virusi vya UKIMWI kuliko wale walio katika  mahusiano yasiyo na ukatili.

Hayo yalibainishwa na meneja utetezi na sera kutoka Shirika la kutetea haki za wanawake KIVULINI, Bi. Celestina Nyenga wakati akitoa mada katika kamati ya kudhibiti UKIMWI ya halmashauri ya jiji la Mwanza (CMAC) juu ya Uhusiano kati ya UKIMWI na Ukatili dhidi ya Wanawake iliyokaa  Juni 17, 2011 katika ukumbi mdogo wa jiji.

Bi. Nyenga aliileza kamati hiyo kuwa kutokana na ukatili wa wanaume, wanawake hushindwa kuwashawishi hata kutumia kondomu na wao kukosa uamuzi wa kuvaa kondomu za kike jambo linalowaweka katika hatari zaidi ya kuambukizwa.

Aliongeza kuwa utafiti uliofanywa na shirika hilo katika mikoa ya Mwanza, Mara, Kagera, Shinyanga na Singida waligundua kuwa wanawake wengi walio katika ndoa hubakwa na waume zao japo suala hilo huwa vigumu kuthilibitisha kisheria.

“ Ubakaji katika ndoa unafanyika kwa mwanaume kumwingilia mwanamke bila ridhaa yake…Mwanaume anaporudi usiku kutoka kwenye ulevi na kumkuta mkewe amelala huishia kumgongagonga kwenye kisigino kama ishara ya kumtaka kimapenzi na anapoona haamki mara nyingi umwingilia kwa nguvu” alieleza Bi. Nyenga.

Alisema kuwa ukatili wa kingono nchini Tanzania unafanyika kwa kiwango cha juu sana ambapo utafiti wa Garcia Moreno mwaka 2005 ulionyesha asilimia 40.4 ya wasichana walifanya tendo la kujamiiana kwa mara ya kwanza kwa kubakwa.

Akinukuu utafiti uliofanywa na Shirika la Umoja wa Mataifa la Kupambana na Ukimwi(UNAIDS) alisema kuwa mwaka 2006, kati ya vijana watatu walioambukizwa virusi vya UKIMWI, wawili walikuwa ni jinsi ya kike.

Aliongeza kuwa wanawake wapatao milioni 13.2 sawa na asilimia 59 ya wanawake wan chi zilizo kusini mwa jangwa la Sahara wanaishi na virusi vya UKIMWI ambapo vijana walio kati ya umri wa miaka 15 hadi 24 wanye maambukizi, theluthi mbili ni wasichana.

Aidha alitaja tatizo la hali ya uchumi kuwa mojawapo ya sababu zinazomuweka mwanamke katika maambukizi zaidi ambapo wanawake na wasichana hulazimika kufanya ngono kwa hiari au kwa nguvu ili kupata chakula, pesa, ada ya shule au kupokea zawadi mbalimbali bila kujua kuwa zawadi hizo zitalipwa kwa tendo la kujamiiana.

Mbali na hayo, ukatili dhidi ya mwanamke uendelea punde anapogundulika kuambukizwa UKIMWI kwa kufukuzwa nyumbani na waume zao kwa sababu wao huwa wa kwanza kugundua hali hiyo wanapoudhuria kiliniki wakati wa ujauzito.

Aidha, Kivulini iliiomba kamati kuangalia jinsi ambavyo mipango yao ya maendeleo dhidi ya huduma za jamii, sera na miradi ya maendeleo inavyoweza kuhuisha suala la ukatili dhidi ya wanawake.

Akichangia katika mada hiyo, Mstahiki Meya wa jiji la Mwanza, Mhe. Jacksoni Manyerere aiitaka jamii kutafuta mbinu za kuwafundisha watoto kusema hapana kwani yeye anaamini kuwa msichana hawezi kubakwa kama hataki.

Semina hiyo iliyoshirikisha wanakamati 25 wakiwemo watumishi wa halmashauri ya jiji la Mwanza, wawaklishi wa madhehebu ya dini, madiwani na wawaklishi wa watu wanaoishi na virus vya UKIMWI ilikuwa na lengo la kutafuta namna ya kushirikiana ki-sera kuoanisha kasi ya maambukizi na ukatili wa wanawake.

Meneja Utetezi  na Sera, Shirika la kutetea haki za wanawake, Celestina Nyenga akitoa mada katika kamati ya kuratibu Ukimwi jiji la Mwanza(kulia kwake) ni Mwakilishi wa Wakristu katika kamati hiyo, Mchungaji Jacob Kituu.

Mwakishi wa Wanaume Wanaoishi na Virusi vya Ukimwi jijini Mwanza, Bw. Chuu Waryoba akichangia mada.

Mwakilishi wa Wanawake wanaoishi na virusi vya Ukimwi jijini Mwanza Bi. Zuhura Hussein akitoa mchango wake juu ya mada ‘Uhusiano kati ya Ukimwi na Ukatili dhidi ya Wanawake’ katika ukumbi mdogo wa jiji.

Mtahiki Meya wa jiji la Mwanza, Mhe. Jackson Manyerere akitoa mchango wake kuhusu uhusiano kati ya Ukimwi na Ukatili dhidi ya Wanawake(kulia kwake) ni Naibu Meya wa jiji hilo(Bw………) na Mratibu wa Ukimwi katika halmashauri ya jiji la Mwanza Bw. Damas Mukama.

SHIRIKA LA KIVULINI LAANDAA WAPAMBANAJI.

Baadhi ya washiriki wa mafunzo ya mbinu za uongozi jijini Mwanza.

 

KUNA DALILI kuwa tatizo la mfumo dume katika jamii sasa linaelekea kufikia kikomo na wanawake kushika hatamu ya uongozi.

Dalili hizo zinatokana na kitendo cha wasichana 41 wa jiji la Mwanza kuamua kujiwekea mikakati ya kuwa viongozi na wanaharakati kupambana na tatizo la mfumo dume katika jamii.

Wakizungumza mara baada ya kumalizika mafunzo ya mbinu za uongozi kwa wasichana “Young Women Leadership Skills” yaliyoendeshwa na Shirika la kutetea haki za Wanawake, KIVULINI mjini Mwanza walisema kuwa sasa wako tayari kupambana na wanaume katika nafasi mbalimbali za uongozi.
           
Wasichana hao walioshiriki mafunzo hayo ya wiki mbili yaliyomalizika Juni 17 mwaka huu walisema kuwa mafunzo waliyopata yamewapa uwezo mkubwa wa kujiamini na kuweza kusimama mahala popote kugombea nafasi ya uongozi pindi inapotokea.

Aidha, msemo ulizoeleka katika jamii kuwa kumwelimisha mwanamke ni sawa kuelimisha taifa, ulionekana kuwa silaha kubwa inayompa ujasiri msichana wa Mwanza kuanza harakati za kutetea haki zao na kuleta mabadiliko katika jamii.

Wakizungumza kwa nyakati tofauti, wasichana hao walibainisha kuwa kuwepo kwa tatizo la mfumo dume katika jamii ni matokeo ya wanawake kutoandaliwa mapema kushika nafasi za juu za uongozi kwani mara zote nafasi hutokea kwa mtu aliyejiandaa vyema na si suala la bahati.
 
Mmoja wa washiriki Jasmine Jamal (15) ambaye pia ni katibu wa mabaraza ya watoto taifa na  mkoa wa Mwanza alisema kuwa mafunzo hayo yamemwongezea ushawishi wa kufikia malengo yake ambapo hakusita kueleza nia yake ya kuwania Ubunge mwaka 2020.

Jasmine anasema kuwa binafsi mafunzo yamempa mwanga ambapo sasa ameanza kuona picha kuwa mfumo dume na mila potofu zilizomkandamiza mwanawake kuwa hawezi sasa vinaelekea kufikia ukomo wake kutokana na mwamuko aliouona kutoka kwa washiriki wenzake.

Katibu huyo wa mabaraza ya watoto ambaye pia ni mshauri nasaha katika shule yake ya sekondari ya Butimba Day na mtangazaji maarufu wa Redio SAUT anaongeza kuwa mafunzo aliyopata yamezidi kumwaminisha kuwa wanawake wanaweza bila hata kuwezeshwa wakiwa na malengo yaliyo bayana.

Aidha alitoa wito kwa wasichana na watoto wenzake kutokubali kukatishwa tamaa na utamaduni uliozoeleka kuwa wanaume ndio tu wanaoweza kushika nafasi za juu za uongozi bali watumie nafasi wanazozipata kupambana kikamilifu ili kuishawishi jamii kuwaamini na kuwapa dhamana kubwa za uongozi.

Mshiriki mwingine Rehema Meshack(19) naye akiwa na ndoto za kugombea Ubunge alisema kuwa semina hiyo imekuja wakati muafaka na kuitaka serikali na vyama vya siasa kuweka mazingira mazuri ya kuwapata viongozi wanawake na kuzingatia suala la mgombea binafsi wakati wa kuandika katiba mpya.

Rehema anasema kuwa wasichana wengi wana rekodi nzuri za uongozi ambazo zinazotakiwa kuendelezwa na kuwaongezea mbinu za kufikia malengo waliyojiwekea na pia kuwajengea matumaini mapya waliokwisha kukatishwa tamaa na dhana ya mfumo dume.

“… Kwa mfano mimi nimekuwa mjumbe wa Baraza la watoto nikiwa na miaka Saba, mwaka 2006 hadi 2007 nikawa Mhasibu, mwaka 2008 Mwenyekiti wa baraza hilo mkoa wa Shinyanga ambapo mwaka huo huo hadi mwaka 2010 niliochaguliwa kuwa Mhasibu katika ngazi ya taifa” alisema Rehema.

Aliongeza kuwa baada ya kustaafu, Rehema ameendelea kuwa Mshauri wa mabaraza hayo taifa na mkoa wa Mwanza ambapo baada ya mafunzo ya mbinu za uongozi  anakusudia kuanzisha NGO yake kuwasaidia watoto na wasichana wenzake katika harakati za kuwania uongozi katika chaguzi mbalimbali.

Kwa upande wake mshiriki kutoka shule ya sekondari Mnarani, Christina Joseph (K.IV) alisema kuwa mafunzo aliyoyapata yamekuwa nguzo kuu ya kuchochea hamu yake kuwa Mwanasheria maarufu nchini.
Alisema kuwa pamoja na kujifunza aina na mbinu mbalimbali za uongozi kwa lengo la kufikia usawa wa kijinsia katika ngazi za uongozi nchini amegundua pia kuwa elimu ni nyenzo kuu katika kufika malengo.

Naye Safaa Ally (26) alibainisha kuwa ili kuwa mpambanaji na kiongozi mzuri wa baadaye msichana anapaswa kwanza kuwa kiongozi wa mwili wake mwenyewe na kujijengea taswira nzuri katika jamii kwa kuepuka mimba za utotoni ambazo uwafanya wengi wao kushindwa kufikia malengo waliyojiwekea.

Washiriki waliongeza kuwa endapo kila mtoto ataziishi ndoto zake za kuwa mtu fulani katika jamii wanazojiwekea tangu utotoni itakuwa silaha kubwa ya kukomesha mimba za utotoni au ndoa katika umri mdogo hivyo kufika pale wanapopataka.

Kwa upande wa baadhi ya wasichana viongozi waliotoa mada katika semina hiyo, Waziri wa jinsia na mambo ya jamii ambaye pia ni mwanafunzi wa mwaka wa pili katika Chuo Kikuu cha St. Augustine Bi.Juliana Ezekiel na makamu wa rais wa Chuo hicho Bi. Anna Mushi, pamoja na kusisitiza suala la kujiamini pia walitoa nguzo nne za kuwa kiongozi.

Wlizitaja nguzo hizo zitakazo wasaidia wanawake kupambana na mfumo dume katika jimii kuwa ni pamoja na kuwa na ndoto, kumcha Mungu, kujituma na kuhakikisha wantumia njia sahihi  kuyafikia malengo yao.

  “Wanawake wajiamini kuwa wanaweza bila hata kuwezeshwa kwani mifano ni mingi, tunawaona wamama wenzetu kama naibu katibu mkuu wa umoja wa mataifa, Dk. Asha-Rose Migiro, Spika wa Bunge la Jumhuri ya Muungano wa Tanzania Mhe. Anne Makinda, Rais wa Liberia na Mkurugenzi wa Kivulini Bi. Maimuna Kanyamala... Wanawake tuamini tunaweza!” walisema viongozi hao wa SAUT.

Juliana na Anna walishauri pia mafunzo hayo kufanyika mara kwa mara ili kuwaweka wasichana katika hali ya utayari pindi nafasi za kuongoza zinapojitokeza na kuyaomba mashirika mengine kuiga mfano wa KIVULINI.

 Naye mkufunzi katika semina hiyo Bw. Benard Makachia alisisitiza kwamba kuwa mwanaume siyo kigezo tosha cha kuwa kiongozi na kuitaka jamii kuondokana na dhana potofu kwani uongozi ni mchakato ambapo wanawake wakiandaliwa vizuri wanaweza kuongoza.

Bw. Makachia anaamini kuwa mikono inayolea mtoto ndiyo inayolea dunia na kwamba nchi zote zinazoongozwa na wanawake zinakuwa katika mikono salama akitolea mfano nchi za Liberia n.k.

 “Mfano, Tembo/ndovu nchini India pamoja maguvu waliyonayo hufungwa kwa kamba tena nyepesi lakini hawatoroki kutokana na jinsi walivyokuzwa tangu utotoni…Unapomwambia mtoto ‘acha kulia kama mwanamke..jikaze kiume..nk’ unamjengea dhana kuwa mwanamke ni mtu duni” alisema Bw. Makachia.

Akieleza malengo ya mafunzo hayo Mkurugezi mtendaji wa KIVULINI Bi.Maimuna Kanyamala alisema kuwa ni kuwaongezea ufahamu wasichana kuhusu haki za wanawake na haki za binadamu sambamba na kuwaanda kushika nafasi pindi wanawake waliopo katika ngazi za uongozi wanapostaafu.

Aidha, Bi. Maimuna aliongeza kuwa mafunzo hayo yanalenga kuziba mwanya (gap) kati ya viongozi wanawake na wanaume ambapo takwimu zinaonyesha kuwepo kwa pengo kubwa kati yao.
    
 “Tunawaandaa wanawake ili kuziba pengo kwani wanawake wanaweza kuongoza tatizo ni kuchelewa kwa fursa za wao kujitambua” alisema Bi. Maimuna.

Kwa mujibu wa takwimu za Mpango wa Kukuza Uchumi na Kupunguza Umasikini Tanzania (MKUKUTA) toleo la mwaka 2009 “umasikini na maendeleo ya watu” pamoja na viti maalumu, jumla ya wabunge wanawake walikuwa 75 kati ya wabunge 323 wa bunge la Jamhuri ya Muungano wa Tanzania kufuatia uchaguzi wa mwaka 2005.

MKUKUTA walibainisha pia ongezeko la uwakilishi wa wanawake katika utumishi wa umma kutoka asilimia 20 mwaka 2005 hadi 22 mwaka 2009.

Ongezeko jingine la kupigiwa mfano ni katika nafasi za majaji kutoka majaji wanawake nane hadi 24, makatibu wa kudumu (Permanent Secretaries) saba hadi tisa na manaibu wake mmoja mpaka kufikia watatu ambapo kwa upande wa makatibu tawala wa mikoa (RAS) waliongezeka kutoka watano mpaka saba.

Kwa upande wa serikali za mitaa katika ngazi za vijiji, kata na halmashauri takwimu hizo zinaonyesha ongezeko la asilimia 18.6 (2006) kutoka asilimia 9.6 mwaka 2003 wanaume wakiwa kati ya asilimia 26.6 (2006) na 24.2 mwaka 2003.

 Mafunzo ya kumjengea uwezo mwanamke kwa nia ya kukabiliana na pengo hilo yamekuwa yakiendeshwa na shirika la KIVULINI katika wilaya mbalimbali za kanda ya Ziwa na mkoani Singida ambapo juni mwaka huu jumla ya wasichana 41 kutoka wilaya za Ilemela na Nyamagan, mjini Mwanza walishiriki.

Wakati wa kilele cha mafunzo hayo jumla ya wasichana kumi walichaguliwa kusambaza elimu hiyo kwa wenzao wa mikoa ya Mara na Shinyanga, kumi wengine walipata nafasi ya kuudhuria mafunzo ya utayarishaji wa vipindi vya redio ambapo wanatazamiwa kurusha vipindi hivyo kwa kushirikiana na Afya Redio ya jijini Mwanza kwa nia ya kuielimisha jamii kuhusu haki zao.

Aidha washiriki wengine walitazamiwa kusambaza elimu waliyoipata katika mafunzo hayo katika klabu zao walizotoka na jamii inayowazunguka ili kutokomeza tatizo la mfumo dume kwa kuweka usawa katika ngazi za uongozi.

KIVULINI ni shirika linalojishughurisha na utetezi wa Haki za Wanawake na Haki za binadamu katika mikoa ya kanda ya Ziwa na Mkoa wa Singida.


MENEJA WA VIPINDI VYA AFYA RADIO, MR. FARAJA AKIFAFANUA JUU YA USHIRIKI WAO KATIKA KUANDAA VIPINDI VYA RADIO.

Meneja Utetezi na Sera wa Shirika la kutetea Haki za Wanawake KIVULINI, Bi. Celestina Nyenga akifundisha katika semina hiyo

BAADHI YA WASICHANA WAKIFUATILIA MAFUNZO HAYO.........

FAHAMU JINSI ANGELA NA ANGELINA WALIVYOFANIKISHA UTIAJI SAINI WA MKATABA WA WAFANYAKAZI WA NDANI-ILO.



Angela (kushoto) na Angelina wakipozi eneo la KIVULINI,mjini Mwanza baada ya kutoka Uswizi.


INAAMINIKA kuwa katika maisha mlango mmoja wa mafanikio unapofungwa basi mlango mwingine huwa umefunguliwa na ambapo mtu uhisi mafanikio yapo maili 100 huenda inchi moja tu huwa imesalia.

Hayo yalidhihirishwa na wawakilishi wa Tanzania katika mkutano wa Shirika la Kazi Duniani (ILO) mjini Geniva-Uswizi, Angela Benedicto(24) na Angelina Nyamuhanga(17) ambao awali walikwisha kata tamaa ya mafanikio katika maisha kutokana na hali halisi ya maisha wanayoshi.
[+/-] show/hide this post
Wasichana/watoto hao kutoka Mwanza na Musoma ambao ni wafanyakazi wa kazi za nyumbani waliiwakilisha Tanzania katika mkutano wa kimataifa ulioanza mwezi Mei na kumalizika Juni 2011 mjini Geniva kwa kutanguliwa na ujumbe kutoka kwa wafanyakazi wa nyumbani.

Mkutano huo ambao ni  wa 100 wa Shirika la Kazi Duniani (ILO) ulianza ‘rasmi’ Juni Mosi baada ya kutanguliwa na mkutano wa wadau kupanga hoja mjini Geneva, Uswisi ambapo Rais Jakaya Kikwete alikuwa miongoni mwa viongozi saba duniani ambao walikuwa wageni maalumu na kupangwa kuhutubia siku ya kilele chake Juni 16.

Tofauti na miaka mingine ambayo wafanyakazi wa nyumbani Tanzania walituma uwakilishi wa maandishi, mwaka huu wajumbe kamili walihudhuria mkutano huo kabla ya kuanza rasmi kwa wageni maalum (wakuu wan chi).

Katika mkutano huo ulioudhuriwa na wajumbe wa mabaraza ya kazi kutoka nchi mbalimbali duniani, wawakilishi kutoka Tanzania na wenzao kutoka nchi nchi za Ufilipino na Costa-Rica pamoja na kuelezea mazingira ya kazi zao walikuwa na jukumu la kupigia debe kifungu cha nne(4),kipengele cha nne(4) cha mkataba wa ajira duniani kuhusu elimu na mazingira bora ya kazi kabla ya mkutano huo kuanza rasmi.

Pamoja na kujadili kipengele hicho, wawakilishi hao walitakiwa kuwashawishi wajumbe wa mkutano huo kukipitisha na kujadili kwa pamoja juu ya umri wa wafanyakazi wa nyumbani, usalama wa afya zao kazini, elimu na namna ya kuwajengea uwezo wa kufikia maisha bora.

Aidha washiriki walitakiwa kutoa maoni yao dhidi ya aina ya kazi zinazotakiwa kufanywa na wafanyakazi wa nyumbani, mazingira na hali halisi wanamofanyia kazi, mazingira yanayohatarisha afya zao, uslama na makuzi ya mtoto anayefanyakazi za ndani na kutakiwa kwa pamoja kupinga ajira kwa watoto.

Mbali na hayo, kipengele hicho kinakataza kufanyakazi usiku, ukomo wa masaa ya kazi kwa kutoa fursa kwa mfanyakazi wa ndani kupumzika, kuwasiliana na familia zao pamoja na fursa ya kujiburudisha. Pia walitakiwa kuweka taratibu za kufuatilia mazingira ya kazi zao na mikataba yao ya kazi.

Wawakilishi hao wanasema kuwa ziara hiyo imefufua upya matumaini yao na watoto wenzao ambao hapo kabla hawakutegemea mchango wa kazi zao kutambuliwa na kuthaminiwa kimataifa.

“ Kutokana na kunyanyaswa na kudharauliwa kwa kazi zetu za (ndani) nyumbani, hatukutegemea kama ipo siku ambayo tunaweza kupanda ‘madege’ makubwa kuiwakilisha nchi huko Ulaya na kukutana na viongozi wakubwa ambao kabla tuliwaona na kuwasikia tu kwenye vyombo vya habari” Wanaeleza.

Waliongeza kwamba tofauti na mawazo yao kuwa safari kama hizo huwa ni za viongozi wachache, familia bora na watu wenye kisomo, ziara hiyo imefufua fikira mpya na nuru ya mafanikio kwa wafanyakazi wa majumbani kwa kuona mchango wa kazi zao umetambuliwa kimataifa.

Swali ambalo wengi wanajiuliza ni kuwa waliwezaje basi wafanyakazi wa nyumbani kuwakilisha nchi kimataifa?

Kujibu swali hilo, Angela na Angelina hawasiti kulitaja Shirila la kutetea haki za wanawake KIVULINI la jijini Mwanza kwa kuwaibua, kuwajengea uwezo na thamani katika jamii ya watanzania hadi kupata nafasi hiyo.

KIVULINI kwa kushirikiana na viongozi wa serikali za mitaa kwa muda murefu wamefanya jitihada za kuwatambua wanawake wanaofanya kazi hatarishi, kuwakusanya kwenye vikundi na kuwapa semina za mara kwa mara kwa mikoa ya kanda ya Ziwa hadi kutuma wawikilishi hao katika mkutano wa shirika la kazi duniani.

Wakieleza ukubwa wa tatizo, Angela na Angelina wanasema kuwa pamoja na nchi nyingi kuwa na wafanyakazi wa nyumbani wanaofanyakazi katika mazingira hatarishi katika umri mdogo,ni nchi tatu tu za Tanzania, Costa-Rica (wawakilishi wawili wawili) na Ufilipino iliyokuwa na mwakilishi mmoja.

Ni uzoefu gani wameupata kutoka kwa wenzao katika mkutano huo?
Angela na Angelina wamasema kuwa tofauti na hapa kwetu Tanzania, wafanyakazi wa ndani katika nchi za Costa-Rica na Ufilipino hupata fursa za elimu ambapo nyakati za asubuhi hufanya kazi za waajiri wao na jioni huudhuria vipindi darasani.

Wanaongeza kuwa serikali na jamii katika nchi zao huthamini dhamana wanayokuwa nayo wafanyakazi wa nyumbani katika kulea watoto wa waajiri wao,kutunza nyumba na kupokea wageni hivyo kuona umuhimu wa kuwaelimisha wafanyakazi wao.

Angela na Angelina ni akina nani hasa? Na ni kwanini wachaguliwe wao kuwakilisha nchi?
 Kwa pamoja wanakili kutokuwa na elimu ya kutosha ya darasani wala vipaji vingine zaidi ya karama waliyopewa na mwenyezi Mungu ya kujieleza kwa ufasaha mbele za watu na ujasiri wa kueleza matatizo yao ya kazi bila woga.

Wote wanataja sababu ya kujiingiza katika kazi hiyo kuwa ni kutokana na adha ya kuyumba kwa familia na ndoa za wazazi wao na hatimaye  kuvunjika wakingali wadogo hivyo kulazimika kubeba majukumu mazito ya kulea familia katika umri huo.

Aidha tofauti na Angelina ambaye hakubahatika kusoma hata darasa moja, Angela  baada ya kufeli mtihani wa kidato cha nne na kukutana na ukali wa baba na mama yake wa kambo alilazimika kujitafutia ajira bila mafanikio na hatimaye kumpata mwajiri wa kazi za nyumbani mwenye moyo wa kumwendeleza kielimu.

Angelina anasema kuwa hakubahatika kuonja hata darasa moja kutokana na kifo cha baba yake aliyemuacha na miaka miwili.

“Maisha yalianza kuwa magumu baada ya baba kufariki mwaka 1996 kwa ugonjwa wa ini yeye akiwa na mimi nikiwa umri wa miaka miwili tu kwani pamoja na kuwa mwajiriwa wa Jeshi la Wananchi Tanzania (JWTZ) hakufanikiwa kujengea hata nyumba ya kuishi zaidi ya kibanda cha majani kijijini” Anaeleza Angelina.

 Anasema  maisha yalikuwa magumu sana kijijini ambapo mama yao baada ya kurubuniwa na mwanaume aliamua kuuza shamba la urithi kwa shilingi 20,000 na kuhamia mjini Bukoba mkoa wa Kagera sambaba na kaka yake na dada ambao kwa hivi sasa wanaishi na baba yao mdogo kijijini kwa babu.

Akielezea safari yake ya kazi za nyumbani, Angelina anasema kuwa ilianza akiwa na miaka  kumi baada ya baba yake wa kufikia kuachishwa kazi misheni na baadaye kuwatelekeza kwa kuhamia kwa mke mwingine ambaye alimuoa huko na kuwaacha wasijue pa kwenda.

Anasema kuwa baada ya kuchangiwa nauli kidogo na Misheni alipofanya kazi babayao wa kambo na hela kidogo aliyopata kaka yao ambaye kwa wakati huo alifanya vibarua bandarini waliweza kurudi Musoma na kupanga chumba kwa shilingi 3,000 mwaka 2004 hivyo yeye kulazimika kutafuta kazi za ndani kuendesha familia.

Kwa mshahara wa shilingi 20,000 Angelina anaweza kulipia chumba alichopanga mama yake, maji na matumizi ya nyumbani pamoja na matumizi yake binafsi. Pia kwa mshahara huo huo huwasaidia dada yake(mama wa watoto watatu) na kaka yake ambaye ni fundi baiskeli kijijini Tarime

Aidha pamoja na changamoto wanazokutana nazo Angela na Angelina wanataja faida ya kazi za nyumbani kuwa imewapa uwezo wa kujifunza mambo mengi ya kifamilia kama vile kulea watoto, kutunza nyumba, kupokea wageni na mambo mengine ambayo hata umri wao unakuwa bado kama jinsi ya kuishi na mme vizuri katika ndoa kwa kugundua makosa ambayo mara nyingi huwafarakanisha wanaume na wake zao.

Nini faida ya safari yao Uswizi?
Wanasema baada ya safari hiyo ambayo iliwafunulia mambo mengi sasa wanaweka mkakati wa kuhakikisha wafanyakazi wenzao wa nyumbani wanathaminiwa na kupata haki kama wafanyakazi wengine na kudai haki ya elimu.

Wanataja mbinu watazozitumia kuwa ni pamoja na kuwatembelea majumbani mwao na katika vikundi mbalimbali vilivyokwisha kuanzishwa kwa kushirikiana na Shirika la kutetea haki zao la KIVULINI.

Aidha wanatoa wito kwa waajiri kuwachukulia wafanyakazi wao kama sehemu ya familia kwa kuthamini utu na haki zao za msingi kama binadamu wengine na jamii kuvunja ukimya kuhusu matendo maovu wanayofanyiwa wafanyakazi wa nyumbani.

Pia waliiomba serikali kuweka vipaumbele katika mikataba na sheria mbalimbali ilizokwisha zisaini kuhusu ajira kwa watoto na haki za binadamu badala ya kuishia kwenye makabrasha!

Akizungumza na waandishi wa habari mara baada ya kumalizika kwa mkutano huo Waziri wa Kazi na Ajira, Gaudentia Kabaka alisisitiza kuwa… kulingana na viwango vya ILO, mfanyakazi wa ndani hana tofauti na wengine wanaopaswa kufanya kazi zisizo za kushurutishwa.

“Mkataba ukisharidhiwa kwa ajili ya wafanyakazi wa ndani, tutauchukua na kuupeleka bungeni ili ujadiliwe na ukipitishwa. Ina maana Sheria iliyopo itaongezewa nguvu” alisema Waziri Kabaka.

Akifafanua kazi za staha kama zilivyoainishwa na mkutano huo kuwa ni pamoja na kuwekewa akiba katika mifuko ya hifadhi ya jamii, kupata haki na uhusiano wa mazungumzo kati ya mwajiri na mwajiriwa.

"Mwajiri atalazimika kumchangia kwenye hifadhi ya jamii na sisi tutahakikisha tunasimamia na kufuatilia hawa watumishi wa ndani watendewe haki," alisema.

Alifafanua kwamba, wameiomba ILO iwezeshe kufanya ukaguzi majumbani kubaini kama wafanyakazi hao wanatimiziwa haki zao.

Ukaguzi huo utalenga kubaini waajiri wasiowalipa wafanyakazi kwa kuzingatia kima kilichotangazwa ambacho mfanyakazi wa ndani anayeishi katika nyumba husika anapaswa kulipwa kuanzia Sh 20,000, asiyeishi nyumbani ni Sh 65,000 na wanaofanya kazi kwa mabalozi na viongozi ni Sh 80,000.

Mbali na Rais Jakaya Kikwete ambaye ni mkuu wa nchi pekee aliyealikwa kutoka barani Afrika, wageni maalumu wengine walikuwa ni pamoja na Rais wa Jamhuri ya Indonesia, Susilo Yudhoyono na Kansela wa Ujerumani, Angela Merkel.

Viongozi wengine waliohutubia mkutano huo uliojumuisha washiriki kutoka nchi zote 183 wanachama wa ILO ni Waziri Mkuu wa Russia, Vladimir Putin; Rais wa Jamhuri ya Uswisi, Micheline Calmy-Rey; Rais wa Finland, Tarja Halonen na Waziri Mkuu wa Mamlaka ya Palestine, Salam Fayyad.

Kadharika mkutano huo wa 100 tangu kuanzishwa kwa ILO mwaka 1919, ulihudhuriwa na jumla ya watu 7,000 na kushirikisha viongozi wa nchi na serikali wa zamani, mawaziri wa nchi mbalimbali, taasisi za kimataifa, na taasisi za kiraia.
Mada za jumla zilizozungumzwa katika mkutano huo ni pamoja na kiwango kikubwa cha ukosefu wa ajira duniani, zahama ya kimataifa ya ukosefu wa ajira miongoni mwa vijana, jinsi ya kuongeza kiwango cha kulinda watu zaidi duniani kupitia mifuko ya hifadhi za kijamii, na haki za wafanyakazi na watumishi kazini na hasa zile za watumishi wa ndani.


SAFARI YA USWIZI KATIKA PICHA.
 

...wakipata mawidha kutoka kwa Mkurugenzi Mtendaji wa KIVULINI, Bi. Maimuna Kanyamala (hayupo pichani) kushoto ni mlezi wao katika safari hiyo Bi. Groly



Safari sasa imeiva........wanaelekea uwanja wa ndege wa Mwanza kukwea pipa.

Angela akisimulia jinsi safari yao ilivyokuwa katika hafla fupi ya kuwapongeza iliyofanyika katika eneo la bwawa la kuogelea KIVULINI-Mwanza. 

      ACHA NIJICHANE MWENZANGU...USWIZ SI MCHEZO.

Baadhi ya wadau wakiburudika katika hafla hiyo.

YAANI HATA MIMI WAMENIPIGA BAO..........................................................................................................! 

 
Diwani wa kata ya Isamilo naye alikuwepo...